Aste honetan, DBH 4. mailako ikasleek esperientzia aberasgarri eta eraldatzaile bat bizi izan dute, orientazio-proiektu diziplinartekoaren baitan. Helburua argia da: etorkizunari begira dauden erabakiak argiago eta kontzienteago hartu ahal izatea, DBH amaitzean zer bide hartu nahi duten hausnartzeko baliabideak eskaintzea.

Horretarako, ikastolako gurasoen testigantzak jaso dituzte: ibilbide profesional askotarikoak dituzten pertsonak, beren bizipen, zalantza, arrakasta eta ikaskuntzak partekatzera etorri direnak. Benetako adibideak, eta benetako inspirazioa.

Horrez gain, ikastolako ikasle ohiak ere izan ditugu gurean. Egun batean haiek ere gure ikasleak ziren, galdera berdinekin: zer ikasi, nola aukeratu, nola asmatu. Haien bizipenak hurbil sentitu dituzte, eta etorkizun posibleak irudikatzeko lagungarri izan dira.

Aste honetako une berezienetako bat izan da Tony Struch-ekin izandako solasaldia, Zertarako etorri naiz mundu honetara? liburuaren egilearekin. Udan irakurri zuten eta ikasgelan landu zuten liburua honek galdera sakonak planteatu zizkien: nor naiz? zer nahi dut izan? Zein da nire bidea? Egilearekin izandako elkarrizketa hurbila eta inspiratzailea izan da, hausnarketarako eta motibaziorako aukera paregabea.

Horrez gain, Lauaxetan egin daitezkeen Batxilergoko aukera desberdinak ezagutu dituzte, bakoitza zein irteera profesionalekin lotuta dagoen argiago ikusteko. Horrela, bakoitzak bere interes eta ametsekin koherente den bidea aukeratzeko tresnak izan ditu eskura.

Eta guztiarekin batera, barne hausnarketarako eta lan pertsonalerako tarteak izan dituzte, jasotako guztia antolatu eta erabakiak pausoz pauso hartzeko lagungarri.

Aste aberatsa izan da, inspirazioz betea, eta ziur gaude etorkizunari begira urrats sendoak emateko baliagarria izango dela.