Erabat ulertzen ditugu gure seme-alaben gailu teknologikoen gehiegizko erabileraren inguruan sortzen diren kezkak. Hala ere, hezitzaile gisa dugun zereginean, bizi garen munduaren errealitatea ere kontuan hartu behar dugu, eta gure ikasleak prestatu behar ditugu etorkizunean aurkeztuko zaizkien erronka digitalei aurre egiteko.

Ukaezina da mundua gero eta digitalizatuago dagoela eta joera horrek aurrera jarraituko duela etorkizunean. Lan egiteko modutik hasi eta komunikatzeko modua, edo informazioa eskuratzeko moduai dagokionean ere, teknologiak aspektu guztietan du eragina. Gure seme-alabei gaitasun digital esanguratsuak eskuratzeko aukera ukatzea, haiei etorkizunean arrakasta izateko funtsezko tresnak kentzea da.

Garrantzitsua da bereiztea aisialdirako gailu digitalen erabilera eta horiek hezkuntza- eta produkzio-tresna gisa erabiltzea. Pantailako jolasetan eta entretenimenduan emandako denborak mugatua eta arautua izan behar du, baina gailuak ikaskuntza- eta lan-tresna gisa erabiltzea oso onuragarria izan daiteke.

Ikastolan, gure ikasleak beren trebetasun digitalak modu arduratsuan garatzeko berariaz diseinatutako ingurune egituratu batean hezteko ardura dugu. Hemen, teknologia modu produktibo, arduratsu, kritiko, etiko eta sortzailean erabiltzen ikas dezakete. Mundu digitalean konfiantzaz moldatzeko beharrezkoak diren tresnak eta laguntza ematen dizkiegu, kontrolik gabeko eta gainbegiratu gabeko esposizioa izateko arriskua saihesteko.

Gure ustez, kezka horiek legitimoak dira, baina uste dugu ikuspegi egokia ez dela pantailak deabrutzea, baizik eta gure seme-alabei pantailak arduraz eta eraginkortasunez erabiltzen irakastea. Ezinbesteko trebetasuna da, zain duten munduan arrakastaz nabigatzeko aukera emango diena.

Kontua ez da esperientzia analogikoak ordezkatzea, baizik eta horiek osatzea eta gure seme-alabak prestatzea dagoeneko hemen dagoen etorkizun digitalerako. Arazoa ez da pantaila, pantaila gaizki erabiltzea baizik.

Elkarrekin, oreka osasungarria aurkitzeko lan egin dezakegu, eta ekarpen positiboa egin, seme-alabak prest egon daitezen etorkizunak ekarriko dizkien erronkei aurre egiteko.