“Memoria duen etorkizuna. Jakin nahi dugu!’ izenburu pean, Gogora-Bizikidetzaren eta Giza Eskubideen Memoriaren Institutuak terrorismoaren eta indarkeria politikoaren biktima guztien oroimenez urtero antolatzen duen ekitaldi honek erakundeetako agintari nagusiak eta hezkuntza-proiektuetan parte hartu dugun ikastetxeak bildu zituen.
Iñigo Urkullu lehendakaria buru zela, Lauaxetako zenbait ikasle, irakasle eta zuzendaritza Bilboko Euskalduna Jauregian elkartu ziren joan den ostiralean.

Eusko Jaurlaritzaren Memoriaren Eguna ospatzeko ekitaldi instituzionalak memoriaren transmisioa izan du ardatz. Bereziki, iragan hurbilean gertatutakoaren berri izatea eskatzen duen belaunaldi batean jarri nahi izan da arreta. Izan ere, beharrezkoa da historia ezagutzea akats berberak ez egiteko.

Gure iragan hurbilarekiko kritikoa den memoria horren transmisioa, Urkulluren hitzetan, “guztion zeregina da, erakundeena, indar politikoena, gizarte-eragileena, familiena, komunikabideena, baita eskolarena eta unibertsitatearena ere”. Horregatik joan den ostiralean ekitaldi honetara etorri ginen.
Ekitaldiaren nondik norakoei buruzko informazio gehiago uzten dizugu esteka honetan.