Ikasturtea amaitzear gagoz, baina ikasten jarraitu daikegu, eta kasu honetan bezala bada, gehien gustatzen jakun edo interesatzen jakun horretan bada, zenbat eta hobeto!

Ikusi nahi al dozuz DBHn egiten ari garen tailerrak?

Esploratzaileak, Euskal dantzak, Josi eta trikotatu, Euskal pilota, Idazmen kreatiboa, Kirola eta natura, Kantu eta Orkestra, Sormena, Hopscotch iPad programazioa, Indartze tailerra… dira garatzen ari garen tailerretako batzuk.

Informazio gehiago nahi? Bota begirada bat ondoko loturan.

Erantsita, tailer horreen inguruko hausnarketa testua. Nondik-nora? Idazmen kreatiboagaz lotutago tailerretik…

Josteko makinaren zaratotsa entzuten da pasillotik, bozgorailuen azken ikutuak, kronometroak. Arnas sakonen hustutzea. Azken asteetako nerbioak kontrolpean izatea ez da lan makala: urtea luzea izan da eta gogorra ere bai. Pasaden ikasturteko hutsune pandemikoari erantzuna eman behar zaio, orain arte urtero egin dugun modura, bukaera polit batez. Beste behin, heldu da ekaina.

Talentu tailerren astea da urteko azken erronka, aurreko hilabeteetako azterketa, lan, ahalegin eta ikasketa guztia saritzeko momentua, alegia. DBH 1go mailatik hasita eta DBH 4rarte -eta irakasleon gustu eta abileziak abiapuntu-, 450 bat ikasleri kirola eta natura, euskal pilota, futbol teknifikazioa, kantua eta orkrestra, sormena, idazmen kreatiboa, zinema-foruma, programazioa, naturaren explorazioa, lorazaintza, euskal dantzak, bitxigintza, arropen eta altzarien zaharberritzea, josi eta trikotatzea edota enborrezko parkeen sorkuntza probatzeko aukera ematen zaie. Emaitza, ezinhobea: irakasleon ezohiko talentuetatik ikasten dute ikasleek eta ikasleen trebeziekin harritzen gara irakasleok.

Une batez bada ere, ahaztu zaizkigu materiak. Ez gara soilik matematika eta zientziak, hizkuntzak edo heziketa fisikoa. Gure eguneroko txokotik eskapatzen gara eta gurekin, pausuz pausu, ikasleak. Esparru ezberdin batean ezagutzen ditugu eta askok ere, Ikastola aspaldi utzi zutenek, bisitan etortzeko aprobetxatzen dute, eurek bizitako esperientziak berpiztera. Abestiak sortzen dituzte, koadroak margotu, kirolen teknikak ikasi eta praktikan jarri, euren ohiko esparruei kolore berria eman, testuak idatzi, arropak sortu, artilezko txanoak egin. Ikasiz ikasi. Praktikaz ikasi.

Talentuen astetik ikasle eta irakasleon arteko sinergiak sortzen badira gure helburua beteta dagoela esan dezakegu, eta gure ikasturteari benetako agur bat egin diogunaren sentimentuarekin sakon arnasten badugu, hor aurki dezakegu talentuaren definiziorik ederrena.v